Oleh : Nazar Shah Alam
Tam jiseumpom Koran, tum jipeh meja, ikeun le Lako Saudah, “Hana meupu le. Ka abeh malem dum.”
Kamo lam teukeujot teunte bertanya-tanya, pakon kadang hana kom hana lam Lako Saudah kamo ka beungeh meunan.
“Pu na masalah, Lako Saudah?” jitanyong bagah le Mak Amin Labui.
“Hai pu masalah laen? Lage biasa aju. Peukara-peukara pikeran aneuk ureung bako, cuco ureung meugah. Bansa teuleubeh, wareh aulia. Na keuh jak beut bacut sapo ka merasa pikeran droe layak untuk icok keu fatwa. Sang-sang cit ulama ka maksum raya.” Ijaweub ngon mata meutanom beungeh le Lako Saudah.
Teungku Him dari geuduk bak sago Keude Makcek Nur sajan peureute tuha tiba-tiba geubeudoh. Geujak, geuperab bak kamo, geuduk timang meupok-pok keu ngon Lako Saudah.
“Aaaa, ci peugah, pu na masalah?” geuci marit ngon leumbot tapi meunyum tegas. Nyoe ka geutro tuha Al Mukaram Kuta Barka biasa jih ka serius but.
“Meuno, Teungku. Lon sepakat maksit akan mengundang bala. Tapi pukeuh piasan adalah satu-satunya maksit yang paleng raya desya jih melebihi desya munafek, korupsi, pajoh peng aneuk yatim, labo-labo hak fakir miskin, zina, khamar, judi, hana seumayang, poh gob, pelecehan seksual, fitnah, dan sigala macam nyang laen? Sehingga begitu banjir atau na sipeu-peu bala, aju piasan nyang jitran seubago seubab utama.” ka jipeusago pembahasan le Lako Saudah. Kamo meuduk pah aju.
“Wate icok kebijakan piasan-piasan dilarang, tempat wisata diyu tob deungon alasan jeut keu teumpat maksit, pu na teuingat awak nyan keu ureung gasin publo kacang dan jagong reuboh, ureung meukat es krim, meukat balon, peusewa mainan, aneuk-aneuk yatim meukat makanan untuk mita peng jajan, pedagang-pedagang ubeut nyang inan keuh geuteume raseuki bacut leubeh? Wate takeun meunan akan ijaweub, raseuki Allah sipreuk rata sago, beuyakin ngon raseuki Allah bri. Mangat bak jihah, seubab jih na pat jikut tip buleun. Pu susah teuma jih. Aneuk ureung gasin di gampong-gampong meubaje ikula rap hana meuteume ganto.” Lon tamah ngon su ka agak kreuh.
“Ureung tanyoe cit ka meunan tabiat, Lako Saudah. Meunyoe na sipeu-peu hai nyang teuka dari alam, nyan geumita salah cit bak but gob. Peukateun, memang. Miseu takeun hana piasan tapi teuka banjir raya cit, pasti akan geupeusalah awak maen chip, walaupun jih alumni jamaah Kakek cit. Hana awak maen chip, banjir cit, geumita salah bak ureung meucewek, padahai beliau mungken jameun buh Subhanallah bak bagian nyan. Habeh ureung meucewek, geupeusalah teungku ka itamong lam politik. Hana deuh nyan, mita laen. Ukuran nyang droe salah dan jeut keu seubab han geutem sagai-sagai.” Geujaweub le Teungku Him.
“Teuma meunyoe meunurot Teungku, pat iduk salah banjir raya nyan?” jitanyong le Mak Amin Labui. Seolah-olah jih bijak that.
“Nyoe kujaweub ngon ilme lam buku dan lam Alquran beh. Geu-firman le Allah, rusak di laot ngon di darat seubab ulah jaro manusia.
Sementara jino gunong ka abeh tareuloh, penebangan liar, tambang meuh hana kira-kira, jalur ile ie ka teudo, broh ta tik lam krung, meutumpok kuto rata teumpat, tacok bate-bate gajah, bate-bate laen. So kawai lom ie lam tanoh ngon ie tron dari langet? Maka begitu ujeun raya, teukalah banjir. Cuma nyoe nyan tapeugah, han ikap lam ule apa-apa gampong nyang meurumpok ilme bak ceramah-ceramah, bak surah beut sikhan-khan. Miseu takeun maksit, bandum tanyoe na saham bacut sapo lam peukara but salah nyan. Minimal hana seumayang atawa meusulet,reuloh atawa peukuto WC masjid, fitnah gob, ghibah, nyan dosa-dosa nyang berpotensi mengundang bala cit.” Geupeutrang le Teungku Him. Kamo ka meuanggok.
“Teuma kiban solusi jih, Teungku? Pih lom nyoe ka abeh geupeuhareum dum but-but piasan.” Isambong le Mak Amin Labui. Mantong cit seolah-olah jih bijak. Bron takalon muka jih.
“Meunurot catatan sejarah, nyang poh Saidina Ali nakeuh salah sidroe hafiz, penghafal Al Quran. Jadi hana pu neuhireun meunyoe na ureun faseh ayat hadis tapi pemikiran jih salah-salah mantong. Mungken na salah bak hate, na salah bak baje, na salah bak pajoh atawa na pesanan dari to atau jioh. Solusi jih, hana pat tapeugah haba. Hek bak tapeuyakin ureung ka merasa droe jih beutoi bahwa pikeran jih dhaif.” Geujaweub le Teungku Him.
“Lage tapeugah bak Mak Amin Labui bahwa Mawarni hana cinta keu jih, Teungku eu?” ka iteumakat Lako Saudah. Mak Amin Labui jikeuneuk balah tapi bagah geukoh le Teungku Him.
“Bek kabalah, Min. Beutoi narit Lako Saudah nyan.”
Kamo meukhem be raya.
